سودان فيرست
حكاها الثائر إيهاب أحمد في صفحته على (فيسبوك)
… اليوم الأول كنت عطشان شديد جاء واحد وزع موية الصحة الصغيرة البتسقي زول واحد ديك، وآخر واحدة شالها شاب قدامي، وأنا واصلت طوالي ومشيت الولد حصلني ومداها لي وقال لي شيلا أنا بلقى واحدة تانيك، لمن رفضت شديد حلف وقال لي إلا نتقاسمها..!!!
بعدها لاقيت واحد من أصحابي ونحن ماشين لقينا بنت ومعاها أمها خاتين حافظة عصير وبقدموا في الكبابي قالوا لينا إلا تشربوا عصير وشربنا.
خطوتين لقينا شاب شايل بلح (بركاوي) ده بوزع بركاوي (بلح) ما البركاوي البصرفو الرئيس (المخلوع) بشه، المهم شلنا نصيبنا وبقينا ماشين.
بعدو واحد مدّ لينا مناديل ورق قال اتفضلوا يا شباب، واتفضلنا.. بعدو واحد كان بوزع في كيك قال الا نشيل وفي اللحظة ديك بقينا 4 بعد لاقانا واحد من أصحابنا الراكزين ومعاهو صاحبو شلنا الكيك، عشان أصر علينا شديد، صاحبنا دا أدى الكيكة لي طفلة صغيرة قال ليها إلا تشيليها.. أختها الكبيرة لمن شافت الموقف ده ساقتها معاها وبدت تهتف
(حااا تسقط وحااا تسقط وحنعرس شفَّاتة) وضحكنا ما همانا شيء.. ضحكنا كلنا بي الطفلة..
واحد هناك شايل تلفوناتو وكاتب تحويل رصيد مجاني للزول القاطع رصيد وداير يطمن أهلو، والتاني الشايل (ود عماري) وبوزع فيهو مجان لكل خرمان
والشاي الكان بوزعو فيهو مجان
والشير بتاع القروش للموية قبل تصل تخت ليهم الفيها النصيب تلقى الكيس الكبير أو الشوال اتملا أكتر من النص من كمية القروش الدخلت فيهو
والعربات البتوزع في الفواكه يمين وشمال وللناس الطالعين في اللافتات والكوبري بتاع النفق.. والبت الفتحت شنطتها وادتني الحلاوة بتاعة السمسمية ومعاها موية الصحة الشايلاها وابتسمت ومشت وحتى اسمي ما كانت بتعرفه.
وخال صاحبي القال ليهو إنت وين؟ رد ليهو أنا في القيادة وبعدها قال ليهو القروش الحوّلتها ليك دي ادفع منها الشير بتاع الموية والأكل للمعتصمين هناك (وحدد ليهو مبلغ كبير ما حاجة شوية).
أسماء الناس الغايبين كانت مكتوبة في ورق ومكتوب معاها إنت معانا حضور في اعتصام القيادة العامة .. ده غير الناس السمحين الكانوا فاتحين الشوال وبهتفوا: (لو عندك خُتْ.. ما عندك شيل) والناس كلها كانت بتخت بس زول شال مافي لحدي نهاية الشير.
والناس القاشرين بي أسمح لبس وشغالين (نضافه بس) أولاد وبنات
والنقيب حامد الطلع بي الدوشكا ورد الهجوم بتاع الجهاز وقال لي اللواء أنا مخالف تعليمات ولو جوا راجعين تاني بطلع ليهم بي دبابة.. والملازم أول القلبو حار من يومه، الضابط الجاء بي القوة الكانت معاهو من المظلات لحدي القيادة، جاء طمن الثوار وقال ليهم ما تخافوا نحن خالفنا التعليمات عشانكم وعشان نحميكم.
يا اخوانا أربعة شهور مظاهرات ومافي زول اتسرقت منه حاجة..
أربعة شهور مافي أي ولد اتحرش بي بنت ولا حصل العكس.
اربعة شهور مافي أي زول اتشاكل مع التاني من المتظاهرين.
يا اخوانا انتو قادرين تتخيلوا السماحة بتاعة السودان الجديد ده حتكون كيف بعد السقوط؟؟
وسقطت
نقطة سودان جديد
ذكريات اعتصام_القيادة_العامة
مدنيااااااااااو.
